erik alexanyan

Բաղանիսն ու իր հոգսերը

Բաղանիսի խնդիրներից է երթուղային տրանսպորտի բացակայությունը: Բաղանիսցիները հիմնականում իրենց պետքական առաջին ապրանքները գնում են գյուղից, սակայն կան ապրանքներ, որոնք Բաղանիսի խանութներում չես գտնի: Այդ իսկ պատճառով նրանք գնում են Նոյեմբերյան: Օրինակ՝ նրանք կանգնում են ճանապարհի մոտ, պատահական կանգնեցնում մեքենա և գնում: Սակայն նույնը չեն կարող անել կանայք, որոնց ամուսինները արտագնա աշխատանքի են գնում Ռուսաստանի Դաշնություն, որ մի քանի կոպեկ փող աշխատեն և բերեն տուն:

Երկու-երեք տարի առաջ Բաղանիսի գյուղապետ ընտրվեց Նարեկ Սահակյանը, որը, ի դեպ, ՀՀ ամենաերիտասարդ գյուղապետն է: Այս մի քանի տարվա ընթացքում նա որոշակի բարեփոխումներ կատարեց գյուղում, և գրեթե բոլոր բաղանիսցիները, մեծ, թե փոքր, գոհ էին նրա կատարած բարեփոխումներից: Օրինակ՝ նա լուծեց աղբահանության խնդիրը, կառուցեց Բաղանիսի խմելու ջրի նոր ցանցը, նրա միջամտությամբ կառուցվեց Բաղանիսի բուժկետը: Մեր գյուղապետի միջոցով Բաղանիս էին մտնում բազմաթիվ ծրագրեր:

Սակայն նա նոր էր սկսել ծավալել իր գործունեությունը Բաղանիսում, երբ որոշվեց միացնել գյուղերը: Դա սահմանափակում էր գյուղապետի հնարավորությունները: Ճիշտ է, գյուղը և մյուս գյուղերը դեմ էին խոշորացմանը, սակայն դա տեղի ունեցավ: Ես հուսով եմ, որ Նարեկ Սահակյանը կլուծեր նաև երթուղային ցանցի խնդիրը, սակայն խոշորացումից հետո դա քիչ հավանական է:

Ես այս դեպքում էլ հուսով եմ, որ երիտասարդ գյուղապետը կանի ամեն ինչ, որպեսզի ինչքան հնարավոր է, խնդիրներ քիչ լինեն: