Այսօր՝ առավոտյան ժ. 09:30-ից, մի խումբ ուսանողներ դուրս են եկել դասադուլի՝ ընդդեմ «Զինվորական ծառայության և զինծառայողի կարգավիճակի մասին» օրինագծի և տարկետման իրավունքի սահմանափակման:

ԵՊՀ կենտրոնական մասնաշենքի բակում հավաքված ուսանողները «Հանուն գիտության զարգացման» նախաձեռնության համակարգող-անդամների միջոցով փորձեցին կապվել ԿԳ նախարարությանը՝ Լևոն Մկրտչյանին  հանդիպելու պահանջով, սակայն չստացվեց:

Այնուհետև շրջեցին ԵՊՀ մասնաշենքերով, ապա նաև՝ այլ բուհերով, ուսանողներին իրազեկելու և դասախոսական կազմի անդամների՝ օրինագծի վերաբերյալ կարծիքներին ծանոթանալու համար:

Որոշ ֆակուլտետների փակված դռները, խոչընդոտելու փորձերն ու նախարարության լռությունը ուսանողներին չկանգնեցրին. դասադուլի վերջում նրանք ստորագրեցին պաշտպանության նախարարին ուղղված նամակի տակ՝ վաղը դարձյալ հավաքվելու պայմանավորվածությամբ: