Լուսանկարը՝ Տաթևիկ Չուխուրյանի

Երբևէ ձեր ձեռքի տակ եղած «անպետք» թուղթը աղբը գցելիս մտածե՞լ եք, որ այն ամենևին էլ անպետք չէ: Մտածե՞լ եք, որ եթե հավաքեք բոլոր այդպիսի թղթերն ու հանձնեք վերամշակման, ի՛նչ հրաշալի նվեր կլիներ բնությանը:

Լուսանկարը՝ Տաթևիկ Չուխուրյանի

Արի ու տես, որ Երևանում մի խումբ մարդիկ արդեն մտածել են: Հենց դրա արդյունքում էլ մայիսի 12-ին Հռիփսիմեի և Շուշանի նախաձեռնությամբ իրականցվեց «Թուղթը աղբ չէ» ակցիան:
Էս ամեն ինչը դեռ շատ վաղուց էր սկսվել: Երթ Թիմ Թայմում էինք լինում, հաճախ էինք Հռիփսիմեից լսում «Էդ թուղթը աղբը մի գցեք, հավաքելու ենք, հաձնենք վերամշակման» և նմանատիպ այլ արտահայտություններ: Պետք է խոստովանեմ, որ սկզբում թերահավատորեն էինք մոտենում, բայց մենք էլ էինք կամաց-կամաց հասկանում, որ սա հրաշալի գաղափար է: Հետո հատուկ արկղ պատրաստեցինք ու որոշեցինք բոլոր թղթերն այդտեղ հավաքել: Ապրիլին առաջին անգամ իրականացրինք «Թուղթը աղբ չէ»-ն: Մի քանի ժամվա ընթացքում մեզ միացան տարբեր կազմակերպություններ ու մարդիկ: Բերում էին իրենց սևագրերը, լեկցիաները, նույնիսկ պիցայի տուփեր, ՀԴՄ կտրոններ և թղթե բաժակներ էինք հավաքել: Արդյունքում հավաքվեց շուրջ 250 կգ թուղթ, որը հանձնեցինք վերամշակման: Հետո կարդացի ու իմացա, որ դա հավասարազոր է մեկ ծառի կյանք փրկելուն: Ոգևորված մեր առաջին հաջողությունից, որոշեցինք, որ այն պիտի շարունակական բնույթ ստանա:

Լուսանկարը՝ Տաթևիկ Չուխուրյանի

Եվ այսպես մայիսի 12-ին իրականացրինք երկրորդ ակցիան, որի ընթացքում ոգևորությունն էլ ավելի մեծ էր: Հատկանշական էր հատկապես այն, որ մեզ էին միանում տարեցները թղթե ծանր տոպրակները իրենց ձեռքով բերելով, մի բան էլ մեզ էին շնորհակալություն հայտնում նման նախաձեռնության համար: Ակցիայի ամենապոզիտիվ կերպարը փոքրիկ Առնոն էր, ով հավաքել էր ձեռքի տակ ընկած ցանկացած թղթի կտոր և թղթե տուփեր, գեղեցիկ փաթեթավորել էր և բերել մեզ մոտ:

Լուսանկարը՝ Տաթևիկ Չուխուրյանի

Այս անգամ մոտ 300 կգ թուղթ հավաքվեց, որի դիմաց ստացված գումարը որպես օգնություն հանձնվեց Վանաձորի դպրոցներից մեկին:
Հաջորդ ակցիան պատրաստվում ենք իրականացնել մայիսի 26-ին: Դե ինչ՝ միանո՞ւմ եք: