Ծրագրավորման ժամ

Լուսանկարը՝ Անահիտ Գասպարյանի

Լուսանկարը՝ Անահիտ Գասպարյանի

Դեկտեմբերի 10-ին տեղի ունեցավ «Ծրագրավորման ժամ» (Hour of Code) միջոցառումը, որը կազմակերպվել էր «Մայքրոսոֆթ ինովացիոն կենտրոն Հայաստանի» և «Այբ» դպրոցի նախաձեռնությամբ: Այդ օրը Հայաստանի բոլոր մարզերից շուրջ 300 աշակերտներ և ուսանողներ եկել էին «Այբ»՝ մասնակցելու այդ միջոցառմանը, որն անցկացվում է միաժամանակ բազմաթիվ զարգացած երկրներում, իսկ Հայաստանում՝ արդեն 4-րդ անգամ:

Մասնակցության համար պետք էր նախօրոք ամրագրել մուտքի տոմսեր՝ օնլայն տարբերակով: Տոմսերը հանձնելուց հետո աշակերտներին տրվեցին հատուկ շապիկներ, և բոլորը գնացին դահլիճ: Մասնակիցները բաժանվեցին ըստ տարիքային խմբերի, խմբերն էլ՝ 6-8 հոգանոց ջոկատների:

Միջոցառումն սկսվեց ողջույնի խոսքով: Այս պատասխանատու գործը ստանձնել էր Արտաշես Վարդանյանը, ով Հայաստանի «Microsoft Innovation Centre»-ի տնօրենն է: Հետո իրենց ուղերձը հղեցին միջոցառման հովանավորները՝ «Ucom»-ի և «Menu.am»-ի ներկայացուցիչները: Այնուհետև կազմակերպիչները ուղիղ կապով միացան ամերիկյան Microsoft ընկերության տնօրենի հետ, ով մեզ ներկայացրեց «Amazon», «Facebook», «Microsoft», «Google», «Apple» ընկերությունների հաջողության բանաձևերը և հավաստիացրեց, որ յուրաքանչյուրը, ով ունի աշխատասիրություն և տաղանդ, անպայման կհասնի իր նպատակին: Իսկ վերջում «Այբ» դպրոցի տնօրեն Արամ Փախչանյանը նշեց ծրագրի կարևորության մասին և առաջարկեց բաց չթողնել առիթը՝ կերտելու Հայաստանի ՏՏ ոլորտի ապագան:

Լուսանկարը՝ Անահիտ Գասպարյանի

Լուսանկարը՝ Անահիտ Գասպարյանի

Բոլոր խմբերին մոտեցան մենթորները, որոնք սովորեցնելու էին մեզ հետաքրքիր ծրագրեր և բացահայտելու էին ծրագրավորման գաղտնիքները: Մեր մենթորը ընկեր Կարենն էր, ով առաջին իսկ րոպեից դարձավ մեր ընկերը: Մի փոքր խնդիր առաջացավ Wi-fi կապի հետ, քանի որ 300 հոգու ինտերնետ մատակարարելը մի փոքր դժվար էր: Մեր մենթորը հրաշագործ էր: Ինչպես նա էր ասում՝ մի քանի կախարդական գործողություններից հետո՝ մենք հրաշքով ունեինք այն ծրագիրը, որով պետք է աշխատեինք: Իսկ մնացած խմբերին առաջարկվում էր տրամաբանական առաջադրանքներ, մինչև կլուծվեին տեխնիկական խնդիրները:

Մի քանի տեսական հասկացություններից հետո սկսեցինք ուսումնասիրել «Scratch 2» ծրագիրը: Սովորում էինք շարժել անիմացիոն կերպարը, ստիպում էինք պտտվել, հետագծով քառակուսի նկարել, շրջվել կամայական անկյունով, ներմուծել փոփոխականներ, ստանալ արեգակնային համակարգի մոդելը և կարողանալ կառուցել մոլորակների պտույտի սխեման:

«Ծրագրավորման ժամ»-ի ավարտին մեզ բաժանեցին մասնակցության վկայականներ և ուղեկցեցին ճաշարան՝ մի փոքր լիցքաթափվելու: Յուրաքանչյուր ուտեստ արժեր մեկ շնորհակալություն: Շնորհակալությունների հեղեղից հետո պետք է սկսվեր օրվա վերջին մասը՝ էքսկուրսիան «Այբ»-ի Գ մասնաշենքում:

Մեզ դիմավորեցին 4 երիտասարդներ, որոնցից մեկը դպրոցի աշխատակից էր, իսկ մյուսները՝ ավագ դպրոցի աշակերտներ: Մեզ ուղեկցում էր Մագան՝ 10-րդ դասարանի աշակերտուհին: Շրջեցինք բոլոր դասարաններով, ծանոթացանք աշակերտների դպրոցական առօրյային, ուսումնասիրեցինք և՛ տեխնոդասարանը, և՛ ամֆիթատրոնը, և՛ պարասրահը, և՛ նկարչության դասարանը: Ծանոթացանք դպրոցի բարերարների կատարած աշխատանքների հետ և «ուրախ ժամեր» հասկացությանը, որը, ըստ աշակերտների, պետք է կոչվեր «տխուր ժամեր» («ուրախ ժամեր»-ին երեխաները մնում են արտադաժամյա պարապմունքների՝ խնդրելով ուսուցչին բացատրել այն առարկան, որը նրանք լավ չեն յուրացրել):

-Որոշ ժամանակ անց մենք շրջապատված ենք լինելու ավտոմատ համակարգերով, որոնք իրենց վրա կվերցնեն շատ գործառույթներ, որոնք հիմա համարվում են մարդու մենաշնորհը: Հետևաբար այդ համակարգերի կառուցման ու կառավարման լեզվին պիտի տիրապետի ամեն մարդ,- ասաց «Այբ» դպրոցի տնօրեն Արամ Փախչանյանը:

Լուսանկարը՝ Անահիտ Գասպարյանի

Լուսանկարը՝ Անահիտ Գասպարյանի

«Ծրագրավորման ժամ»-ը շարունակական է լինելու, ուստի առաջարկում եմ քեզ հաջորդ տարի չկորցնել հնարավորությունը՝ մասնակից դառնալու այդ գիտատեխնիկական մեծ տոնին: