Սբ․ Մարիամ Աստվածածին եկեղեցին գտնվում է Սպիտակի երկրաշարժի էպիկենտոն համարվող Շիրակամուտ (Նալբանդ) գյուղում, խոնարհվել է ուղիղ 29 տարի առաջ՝ այդ երկրաշարժի ժամանակ։
Եկեղեցու ավերակներին նայելիս կարելի է պատկերացում կազմել, դրա մեծության ու վեհության մասին, սակայն ի՞նչ է մնացել այսօր. մուտքը, որից ներս մի բուռ քարակույտ է, իսկ դեմ դիմաց՝ խորանի փոխարեն, երկու խոնարհված սյուն․․․
Իսկ քիչ այն կողմ աստիճաններ են, հավանաբար ժամանակին կապել են գյուղն ու եկեղեցին, իսկ այսօր ո՞ւր են տանում դրանք, ո՞վ գիտե, երևի իրար են կապում անցյալն ու ներկան․․․
Սակայն հարկ է նշել նաև, որ Շիրակամուտում գյուղի բնակելի մասից մոտ 500 մ դեպի հյուսիս գտնվում է 6-րդ դարում կառուցված Չիչխանավանքը (Սուրբ Խաչ եկեղեցի), որն ունենալով դարերի պատմություն, բազմիցս ավերվել է, այդ թվում և 1988թ․-ի երկրաշարժի ժամանակ, բայց կրկին վերականգնվել է և 2015թ․-ից մինչ օրս գործում է։
Եվ Շիրակամուտում այս երկու վանքերի գոյությունը կարելի է նմանեցնել աղետի գոտու այսօրվա իրականությանը, ուր նույնպես մեկտեղված են անցյալի դառը հիշողություններն ու վերքերը, և նոր կյանքը։