Ամեն ինչ սկսվեց 405 թվականին: Այդ ժամանակ էր, որ Մեսրոպ Մաշտոցը Եդեսիայում ճգնելով ստեղծեց հայոց տառերը, ու այսօր էլ առաջին դասարանցիները ճգնելով ու ծեծվելով սովորում են (խիստ չդատեք, այժմ ինձ համար այդ տարիները կյանքիս ամենավառ տարիներն են): Իրականում խնդիրը մինչև այդ էլ կար, բայց միայն 405 թվականին լուծվեց: Այդ թվից սկսած՝ շատերը՝ նեղվելով, մյուս մասը ուրախությամբ սովորում են Հայոց տառերը: Իրականում ես ինքս մինչև այսօր էլ չհասկացա՝ նեղվողների՞, թե՞ ուրախացողների մեջ էի: Բայց հաստատ գիտեմ՝ հաջորդ տարվանից տխրողների ցանկում եմ լինելու, քանի որ փակելու եմ կյանքիս ամենալուսավոր էջը: Ես փակում եմ, շատերը նոր բացում են ու պիտի բացեն: Երբ մայրերը, թողած իրենց ամենօրյա գործերը, զբաղվում են երեխային տառեր սովորեցնելով, դա ամենաբարդ գործերից մեկն է՝ շատ մեծ աշխատանք պահանջող, որովհետև հիմնաքարերը շարելիս պետք է հաշվի առնել ամեն տեսակ ճշգրտություն: Ա՜խ, գիտեմ՝ հիմքը դնելու ժամանակ երեխաների մեծամասնությունը տխրողների շարքում է, դժվար է, երբ ընկերներդ դրսում խաղում են, իսկ դու ինչ-որ տառեր ես սովորում, որով հետագայում ապագա պիտի կառուցես: Մայրիկն էլ մի փոքր բարկանում է, երբ իր ասածները մի ականջիցդ մտնում ու մյուսից դուրս են գալիս:
Այսօր էլ դպրոցում առաջին դասարանցիներ կան, շատերը չեն սիրում մենակ գալ դպրոց ու այսպես ասած՝ իրենց ծնողներին էլ իրենց հետ դարձնում են դպրոցական: Իմ բարեկամներից մեկի երեխան հենց այդպես էլ անում է՝ մի օր մայրիկին է դպրոց բերում, հաջորդ օրը՝ պապին: Մի օր էլ կրկին մոտեցա բարևելու ու հարցրի.
-Հըն, էլի չի՞ ուզում մենակ գա:
-Չէ,- պատասխանեց տատը,- մեզ դարձրել ա իր պես դպրոցական: Որ ասեմ՝ ընդունակ չի, չի սովորում, սուտ կլինի, բայց ասում ա՝ իմ հետ եկեք: Բա, Լիլո ջան, կգնաս կգրես՝ ընդունակ Սերոն մենակ դասի չի գնում…
Նման դեպքեր ամեն տեղ կհանդիպեն, այն մեկն էլ՝ չսովորող ու չարաճճի, միշտ ծնողի հետ է դասի գալիս, որովհետև ուսուցիչն է ծնող կանչել:
Իսկ ես մի քանի ամսից արդեն միայն հիշողություններ կունենամ իմ մանկության տնից՝ դպրոցից: Ժպիտով կհիշեմ դասարանս և այդ «ծանր օրերը»: Բայց ոչ մեկն էլ չի մոռանա, որ ամեն ինչ սկսվեց 405 թվականին ու կշարունակվի հավերժ: Ու կրկին կղողանջի «սովորիր» խոսքը ու կշարունակվի՝ սովորիր, որ սովորեցնես: