Իմ զրուցակիցը քսանամյա ուսանողուհի Անի Ժամկոչյանն է` Եղեգնաձոր քաղաքից, որի պատմվածքներից մի քանիսը ընդգրկվել են վերջերս տպագրված «Մի կտոր ինձնից» ժողովածուի մեջ: Իր ստեղծագործությունների պես երազկոտ ու «ֆանտաստիկ» ուսանողուհին սովորում է ՀՊՏՀ համալսարանի Եղեգնաձորի մասնաճյուղի ֆինանսներ բաժնում:
Լուսանկարը՝ Լիլիթ Աթոյանի
-Ինչպե՞ս հասկացար, որ կարողանում ես ստեղծագործել:
-Դպրոցում գեղեցիկ շարադրություններ էի գրում: Ուսուցչուհիս առաջարկեց դպրոցական թեմաներից բացի այլ թեմաներով էլ գրել: Հասկացա, որ ստացվում է: Էդպես սկսեցի գրել, չգիտեմ` ինչքանով է ստացվում, երևի ընթերցողը կասի:
-Քեզ համար առավել հոգեհարազատ ժանրերը և թեմաները որո՞նք են:
-Սիրում եմ գրել պատմվածքներ, արձակ ժանրի ստեղծագործություններ: Առհասարակ դժվարանում եմ մտքերս չափածո ձևակերպել. արձակում սահմաններ չկան, և դա ինձ դուր է գալիս:
-Ունե՞ս սիրելի գրող, որը ոգեշնչման աղբյուր է հանդիսանում:
-Սիրում եմ Դեյլ Քարնեգիի վերլուծական ստեղծագործությունները: Ոգեշնչման աղբյուր կարող են հանդիսանալ գրքերում կարդացած էպիզոդները և անգամ բառերը:
-Հետագայում կցանկանայի՞ր զբաղվել գրականությամբ, գրող դառնալ:
-Չեմ կարող ասել, սա ինձ համար առայժմ հոբի է, երևի հետո-ն ժամանակը ցույց կտա:
Լուսանկարը՝ Լիլիթ Աթոյանի
-Վերջերս տպագրվեց «Մի կտոր ինձնից» խորագրով ժողովածուն, որում զետեղված էին նաև քո ստեղծագործությունները: Ի՞նչ կարծիք ունես ժողովածուի և առհասարակ նման նախաձեռնությունների մասին:
-Հետաքրքիր նախաձեռնություն էր, չէի սպասում, որ իմ ստեղծագործությունները կընտրվեն: Դիմեցի, ընտրեցին, շատ ոգևորված էի:
-Կուզենայի՞ր նախաձեռնությունը շարունակական լիներ,ի՞նչ նոր բան կառաջարկեիր նախաձեռնող խմբին:
-Լավ կլիներ շարունակական նախաձեռնություն լիներ, առավել լայն շրջանակներ ընդգրկեր, ավելացվեր տպագրվող էջերի քանակը:
-Քո կարծիքով այսօր մեր մարզում կա՞ն երիտասարդներ, որոնք նույնպես ստեղծագործում են, և գրականությունն է իրենց ոգեշնչման աղբյուրը:
-Իհարկե կան, նրանց ստեղծագործությունները առավել իրատեսական են, բայց ինձ դուր են գալիս ֆանտաստիկ ժանրում ստեղծագործողները:
-Գիտեմ, որ սովորում ես Տնտեսագիտական համալսարանում: Շատ չե՞ն տարբեր տնտեսագիտությունն ու գրականությունը:
-Ես կասեի` նույնիսկ օգնում է ստեղծագործելու իմ ունակությունը: Մասնագիտական որոշ հարցերի մոտենում եմ ստեղծագործաբար՝ ստեղծելով նորը, սեփականը:
