Դու բաղկացած ես շատ մասերից: Խոսքը հիմա այն մոլեկուլների մասին չէ, որոնցով հետաքրքրված է գիտնականների կեսից շատը: Մենք մեր մեջ բաժանված ենք շատ մասերի: Եկե՛ք այդ մասերը կոնֆետներ անվանենք:

Դու ունես շատ կոնֆետներ, այնպես չէ՞։ Դրանցից ոչ բոլորն են քաղցր ու համեղ: Բայց բոլորը քեզնից քաղցր կոնֆետ են ուզում: Դու չես կարող նրանց տալ վատ կոնֆետ, որովհետև նրանք դա չեն վերցնի, ու դեռ մի հատ էլ կշատացնեն քո անհամ կոնֆետները: Բայց հիշիր քո համեղ կոնֆետներին: Նրանք այնքան շատ են ու այնքան լավը:

Դու գիտես՝ ամեն մեկին քանի կոնֆետ է հասնում: Բայց արդյո՞ք դու ճիշտ ես բաժանել կոնֆետները ուրիշների համար: Արդյո՞ք դու ընդհանրապես պիտի քո կոնֆետները նվիրես ինչ- որ մեկին: Կոնֆետները քո ուժերի պես բան են: Պահիր դրանք քո մեջ, որ հետո չփնտրես դրանք ուրիշների մեջ:

Գիտե՞ս՝ շատ մարդիկ կան, ովքեր քիչ կոնֆետներ ունեն: Ու քեզ լավ խայծ համարելով՝ կգան ու կոնֆետներդ կվերցնեն առանց ասելու: Իսկ դու դեռ մի բան էլ ավելին կտաս՝ մտածելով, որ գոնե մի կոնֆետ նրանցից կստանաս: Բայց դու ուղղակի կմնաս առանց կոնֆետի: Դու ուղղակի քեզ անօգնական կզգաս՝ հասկանալով, որ միակ բանը, որ ունես, քո դառը ու անհամ կոնֆետներն են: Չէ, նրանք ագահ չեն ու ունեն հազարավոր կոնֆետներ, որ ուրիշներին են տվել: Ուղղակի դու թեկնածու չես: Նրանք չեն սիրում քո կոնֆետների համը՝ չնայած նրան, որ ընդունում են քո կոնֆետները: Նրանք ուղղակի ամեն օր վերցնում են:

Քո կոնֆետներն ավելի են պայծառանում ու քաղցրանում, երբ ինչ-որ մեկին կոնֆետներ ես նվիրում: Իսկ այդ մարդիկ չեն քաղցրանում՝ քո աչքերի փայլը տեսնելիս: Բայց հենց մի օր դառը կոնֆետ տաս՝ կանհետանան կյանքիցդ:

Կոնֆետ տալը շատ հեշտ է: Բայց դու պարտավոր ես տալ նրան, ով քեզ էլ իր կոնֆետներից կտա: Ի՞նչն է քեզ ուրախացնում: Պետք չէ դա պատմել ուրիշներին, դու ուղղակի մտածիր: Գեղեցիկ երկինքը, ծակող արևը, լավ գնահատականը ու լավ ստացված նկարը, որը սոցցանցում պիտի տեղադրես: Քեզ կոնֆետ կտա լավ երգը ու գեղեցիկ կիսաշրջազգեստը: Քեզ կոնֆետ կտա, երբ քեզ գովեն, ու երբ պարի շարժումները սովորես: Քեզ կոնֆետ կտա ինչ-որ մեկի «ինչպե՞ս ես» արտահայտությունը:

Դու հավաքիր քո կոնֆետները, բայց մի տուր բոլորին անխնա: Նրանք չեն տեսնում կոնֆետը, այլ ինչ-որ թուղթ, որ վայրկենական կգցեն աղբամանը: Քո կոնֆետները ափսոսիր: Գնահատիր ամեն կոնֆետ ու մի լսիր, եթե ինչ-որ մեկը կասի, որ կոնֆետների տուփը անիմաստ բան է: Քո կոնֆետները յուրահատուկ են: Ամեն մարդու կոնֆետ յուրահատուկ է: Ինձ էդպես ասաց մի մարդ, որին ես տվեցի իմ բոլոր-բոլոր կոնֆետները: Ինձ թվաց՝ նա էլ ինձ է տալիս իր կոնֆետները, բայց ոչ մի կոնֆետ ես չստացա: Ես հիմա չունեմ էլ կոնֆետ: Ոչ էլ քաղցրություն, որ վերականգնեմ դրանք:

Ես հիմա հետ եմ բերում իմ կոնֆետները: Ու դու ինձ հիմա հազարավոր կոնֆետներ ես պարտք: Քոնը քեզ պահիր: Ես չեմ վերցնի այն կոնֆետը, որի համը այդպես էլ չիմացա: Ես միայն իմը կվերցնեմ ու կգնամ: Ես շատերին պիտի կոնֆետ տամ: Առաջնահերթը՝ ինձ է պետք կոնֆետ: Իսկ դու դրանք վերցրել ես: Ես միայն իմ կոնֆետները կվերցնեմ: Ես լրիվ վերջացել եմ:

Պատմությունը՝ կարճ, ջերմությունը՝ մեծ։

Հուսով եմ՝ այնտեղ երազանքներդ կկատարվեն։

Դու չդարձար իմ սիրո պատմության հերոսը։ Առանց իմանալու իմ կյանքի սցենարը՝ ստեղծեցիր քոնը իմ ֆիլմի մեջ։ Ստեղծեցիր պատմության նոր գլուխ՝ չիմանալով դրա մասին։ Դու ստեղծեցիր այն, երբ մենք անցյալ տարի էլ իրար կողքի նստեցինք։ Չեմ կարողանում չհիշել իմ ու քո դժգոհ դեմքերը, երբ իմացանք այդ նորության մասին։ Չեմ մոռանա նաև մեր ծիծաղը երկու րոպե հետո։ Չեմ մոռանա քո հորինած երգերը, «շեդեվրները»։ Հիմա ոչ մեկն էլ չի նկարի սեղանների վրա։ Ես էլ ոչ մեկին չեմ ստիպի մաքրել այդ նկարները։

-Մի երկու րոպեից մաքրի, թող մի քիչ էլ հիանամ էս նկարով,- ես կասեի ինքս ինձ ամեն անգամ նկարը վերացնելուց առաջ։

Հուսով եմ՝ կարողացար մարդկանց դեմքեր նկարել։ Նայիր աստղերին և երևակայիր, էդպես ավելի հեշտ է։ Օհ, դու չե՞ս սիրում էդպես ռոմանտիկ բաներ։ Մոռացել էի։

Պիտի պահեի քո բոլոր նկարած նկարները։

Այն օրը մեր հին տեղը եկա։ Ամեն ինչ մաքրել էին։

Քո ձեռագիրը անգիր եմ արել։ Տարբերվող էր մնացածներից։

Մի քանի գրություն կար մնացած։ Ամենատպավորիչը “i don’t know“ արտահայտությունն էր։ Վերջապես ասացի՞ր։ Երբեք չես ասել՝ չգիտեմ։ Կասեիր ամեն բան, մենակ թե այդ բառը չասեիր։ Շնորհակալ եմ, որ ուրախացնում էիր ամեն պահի, ամեն ակնթարթի։ Հիմա չկա իմ կողքին մեկը, ում հետ ժամերով կխոսեմ ամենաանիմաստ, բայց մեր շնորհիվ ամենահետաքրքիր թեմայից։ Շատ ես սիրում անգլերենը։ Վստահ եմ՝ հիմա էլ ես այդ լեզուն սիրում։ Լավ է, որ քո գնացած վայրում բոլորը անգլերեն են խոսում։

Բացի՛ր դուռը։ Ասա ամենահիմար բանը, որ ասել ես քո կյանքում։ Ես քեզ վերջապես կասեմ, որ դու ամենալավ ընկերն ես։ Ու ես կպահեմ քո յուրաքանչյուր բառը, որ արտաբերեցիր ինձ համար։ Ես կերգեմ քեզ հետ, չնայած երբեք այդպես չեմ արել։ Մենք կխոսենք ժամերով իրար հետ, կծիծաղենք։ Դու ինձ հրաժեշտ չտվեցիր։ Գոնե մի օր պարգևիր ինձ հրաժեշտ տալու համար։

Երևի ես կգրեմ իմ նոր սցենարը, պատմության նոր գլուխը։ Բայց գլխավոր հերոսը, մեկ է՝ դու ես։ Նոր սցենարում քո դերը երկրորդական դարձնելը անհնար է։