Լուսանկարը` Նանե Եղիազարյանի
Ահա նորից եկավ իմ սիրելի տոներից մեկը` Նոր տարին: Դե հա, այն դեռ չի հասել տեղ, բայց ճանապարհին է, իսկ ինչպես գիտեն բոլոր այն մարդիկ, ովքեր հավատում են հրաշքների, Նոր տարվա ճանապարհին Ձմեռ պապը մտնում է բոլոր քաղաքներ ու գյուղեր, երջանկացնում երեխաներին իր նվերներով ու մեծ ջերմությամբ: Դեկտեմբերի 27-ին Ձմեռ պապիկը այցելել էր Գետափ գյուղը, և ի ուրախություն ինձ, ես այնտեղ էի գտնվում: Երեխաները մեծ ուրախությամբ ու ջերմառատ ծիծաղներով դիմավորեցին նրան, ասացին հատուկ Ձմեռ պապի համար պատրաստած անգիրները, կամ երգերը և ստացան շատ սպասված նվերները:
Լուսանկարը` Նանե Եղիազարյանի
Համոզված եմ, որ բոլոր քաղաքներում ու գյուղերում էլ երեխաները սպասում են Նոր տարվա տոնին այնպես, ինչպես ոչ մի ուրիշ տոնի չեն սպասել, ու ինձ թվում է, որ չեն էլ սպասի: Երեխաների համար այդ օրը իրականանում են ամենասպասված երազանքները: Երեխաների հետ այս տոնին սպասում են նաև մեծահասակները: Դե լինում են դեպքեր, երբ մարդիկ դժգոհում են, թե շատ ձյուն է եկել, ճանապարհներն են փակվել, տոլման լավ չի եփվել, բայց չէ՞ որ հենց գալիս է տոնը նշելու ժամանակը, բոլորը հագնում են տոնական զգեստները, ժպտում են ու լցնում բաժակները: Եվ ինձ չհամոզեք, թե կա ավելի լավ տոն, քան Ամանորն է: Ոչ մի տոնի ժամանակ ամբողջ աշխարհը չի երջանկանում, չի մոռանում վատը ու դիմացինին մաղթում ամենաբարին ու լավը, զարդարում տունը ու գնում նվերներ ընտանիքի անդամների համար…
Լուսանկարը` Նանե Եղիազարյանի
Այո, ես գրեցի Ամանորի մասին, բայց երբ 17-ի թղթակիցը գտնվում է գյուղում, ու իր ձեռքում էլ լինում է ֆոտոխցիկ, հաստատ չի կարողանա մի քանի նկարներ էլ չանել գյուղի մասին, ու ես էլ բացառություն չեմ:
Լուսանկարը` Նանե Եղիազարյանի
Գետափը իմ ամենասիրելի գյուղերից մեկն է և ունի իր բարբառը, որը նման է Մալիշկայի բարբառին, բայց ինչքանով որ ես եմ տեղեկացված, տարբերություններ ունեն: Իսկ գյուղի բնակիչները բարեհամբույր ու հյուրասեր մարդիկ են: