Լոռու մարզի Հալավար համայնքում գտնվող «Ոստանի» գյուղական հանգստյան գոտին պատրաստ է հյուրընկալել իր զբոսաշրջիկներին։ Մեզ հետ զրույցում «Ոստանի» գյուղական հանգստյան գոտու հիմնադիր Հենրիկ Մխիթարյանը պատմեց անվան ընտրության, տարածաշրջանում առաջինը նման ծրագիրի մասնակցելու և նպատակների մասին։
- «Ոստանի» անվանումը պատահական չի ընտրված։ Այն նշանակում է ավանների, գավառների, թագավորությունների կենտրոն։ Մենք հիմնական շեշտը դրել ենք հենց կենտրոն բառի վրա, քանի որ նպատակ ունենք մեր գյուղը դարձնել էկոտուրիզմի կենտրոն, նպաստել համայնքի զարգացմանը։ Գյուղում արդեն իսկ կան օրգանական մի քանի տնտեսություններ, և մասնակցելով այս ծրագրին, ուզում ենք Լոռիում բարձրացնել զբոսաշրջության մակարդակը։ Կենտրոնը պայմաններ է ստեղծում գյուղացիների արտադրած մթերքների վաճառքի համար, ինչպես նաեւ կազմակերպում է վայրի հավաք եւ այգեքաղ, դրանցից պատրաստած ուտեստների, հյութերի և չրերի համտես ու վաճառք,- Հենրիկի խոսքով կատարյալ հանգիստ սիրող մարդիկ այստեղ իրենց լիարժեք կզգան,- Մեր հյուրերի համար մենք հունիսի 1-ից նախատեսում ենք նաև գիշերակաց և՛ վրաններում, և՛ տնակներում։ Նախատեսում ենք նաև գյուղական սնունդ, քայլարշավներ, մեղրաքամ, ձիարշավ, ապիթերապիա, ջիփփինգ, աստղադիտում և այլն։ Այն մարդիկ, ովքեր նախընտրում են մաքուր ու անարատ գյուղական սնունդ, մենք խոստանում ենք նրանց ծանոթացնել մեր խոհարարների համեղ ուտելիքներին։
«Ոստանի» սոցիալական ձեռնարկությունը աջակցություն է ստացել «Սոցիալական ձեռներեցության էկոհամակարգի զարգացում՝ սահմանային շրջաններում կանաչ առաջընթացի համար» ծրագրի շրջանակներում, որը Եվրոպական միության աջակցությամբ իրականացնում են «Կանաչ արահետ» հասարակական կազմակերպությունը (Հայաստան) եւ CENN-Կովկասի բնապահպանական ընկերությունների ցանց ՀԿ-ն (Վրաստան)։ «Կանաչ արահետ» հասարակական կազմակերպության ներկայացուցիչ Լուսինե Վերդյանի խոսքով՝ «Այս նախագիծը արժանացել է հավանության և ֆինանսավորվել հասարակական կազմակերպության կողմից, և մենք վստահորեն կարող ենք ասել, որ այն նպաստում է երկրում ագրոտուրիզմի մակարդակի բարձրացմանը», և հույս ունեն, որ նման ծրագրերի ֆինանսավորումը կկրի շարունակական բնույթ։
