Լուսանկարը` Անահիտ Բաղշեցյանի
Այսօր Երևանին նայելու ենք մեկ այլ անկյունից։ Դրա համար ուղղակի անհրաժեշտ է որևէ ծառի շվաքում կամ շենքի ստվերում գտնել մի ծերուկի կամ տատիկի, ով վաճառում է ծիրան, ու գնել ինչքան ուզում ես։ Հետո պետք է գտնել մի տարեց մարդու և նստել նրա կողքին ու հյուրասիրել համով ծիրանը։ Ի դեպ, կարող ես ընտրել հենց ծիրան վաճառող ծերուկին։
Ընտրածդ անձնավորությանը ներկայացիր ու խնդրիր, որ պատմի իր կյանքի պատմությունը։
Էստեղ կսկսվի բուն արկածը՝ Երևանում ապրող հասարակ քաղաքացու պատմությունը։ Այն կարող է լինել շատ հասարակ, կամ ընդհակառակը՝ անչափ արտասովոր։ Պատմության մեջ միգուցե տեսնես ինքդ քեզ, ընկերոջդ, նպատակներդ, միգուցե հայտնաբերես մեկ այլ իրականություն։ Այս պատմության մեջ կտեսնես ինչպիսին է եղել Երևանը տասնամյակներ առաջ։ Շատ հավանական է, որ ընտրածդ ծերուկը Երևանից չլինի, բայց միևնույնն է, կլսես երևանյան մի պատմություն, քանի որ նա հիմա նտած է Երևանի մի անկյունում։ Վստահ եմ, որ պատմությունը լսելիս աչքերիդ առաջ Երևանը կնմանվի հին կինոնկարի՝ լցված սևով ու սպիտակով, շտապող մարդկանցով, հին հագուստներով ու սակավաթիվ մեքենաներով։ Կինոնկարդ միգուգե զարդարեն հին երգերը, ձմեռվա բուքն ու բորանը, երազանքի հետևից Երևան եկած ընտանիքներն ու պատանիները։ Վերջում հարցրու ծերուկին ինչ ցանկանում ես՝ սիրու՞մ է նա այս քաղաքը, ի՞նչ խորհուրդ կտա քեզ ապագայի համար, հավանե՞ց ծիրանը։
Այսպես Երևանում ապրող յուրաքանչյուր անձնավորություն՝ ես, դու, ծիրան վաճառող ծերուկն ու մանկապարտեղից տուն շտապող փոքրիկն ունի իր պատմությունը։ Այդ հազարավոր պատմությունները միաձուլվելով դառնում են մի հասարակ պատմություն, որ կերտում է Երևանը։
Կարող ես հագնել ականջակալներդ ու քայլել պատմություններով լցված Երևանի գրկում։