Լուսանկարը՝ Սոնա Զաքարյանի
Հիշո՞ւմ եք, նյութերիցս մեկում ձեզ պատմել էի Մուրզիկի մասին: Մուրզիկը կորցրել էր իր ընկերուհուն և միայնակ էր մնացել: Երկար ժամանակ նա չէր երևում մեր բակում: Մենք էլ մտածում էինք, գուցե հեռացել է այստեղից, որ վիշտը մոռանա: Մի օր էլ նա անսպասելի հայտնվեց: Մի տեսակ աշխույժ էր, վազելով գալիս էր քսմսվում ոտքերիս, ինչպես սովորաբար կատուներն են անում: Հետաքրքիր էր, ի՞նչն էր նրա ուրախության պատճառը…
Մռայլ եղանակ էր, անձրևը դադարել էր, բայց արևի շողերի մի նշույլ անգամ չէր երևում: Եղանակի փոփոխությունները տեսնելու համար գնացի պատուհանի մոտ և հանկարծ տեսա Մուրզիկին: Նա մենակ չէր, նրա հետ մի գեղեցիկ օրիորդ կատու կար: Շա~տ զարմացա, քանի որ Մուրզիկը չէր թողնում, որ ուրիշ կատուներ գան մեր բակ, նա իր միանձնյա իշխանությունն էր հաստատել բակում: Բայց այս փոքրիկ ու գեղեցիկ օրիորդ փիսիկին ոչ միայն թողել էր մեր բակ, այլ նաև նրա հետ էր կիսում ուտելիքը: Ուր որ գնում էր օրիորդ փիսիկը, Մուրզիկը վազում էր նրա հետևից: Անգամ կռիվ է արել բակի կատուներից մեկի հետ: Մուրզիկը չէր կարող հանդուրժել, որ իր փիսիկին, ինչ որ ուրիշ կատու հետապնդեր, և հաշվեհարդար տեսավ նրա հետ: Կատվի բուրդը քամուն էր տվել, և եթե ես և եղբայրս չշեղեինք Մուրզիկի ուշադրությունը, խեղճ կատուն գուցե չկարողանար փախչել:
Լուսանկարը՝ Սոնա Զաքարյանի
Այդ դեպքից հետո նա մեր թաղերում ընդհանրապես չերևաց: Իսկ Մուրզիկի սիրո ռոմանտիկ պատմությունը դեռ շարունակվում է: Մի անգամ տեսա նրան և ընկերուհուն պատի վրա կողք-կողքի նստած և կարողացա այդ ռոմանտիկ պահը հավերժացնել լուսանկարելով: Իհարկե, դժվար էր այնպես անել, որ նրանք չնկատեն դա: Դե ինչ, Մուրզիկն ու իր ընկերուհին էլ հայտնվեցին համացանցում իրենց գեղեցիկ սիրո պատմությամբ…
Ես շա~տ ուրախ եմ, որ Մուրզիկը նոր ընկերուհի է գտել, և կյանքը նրա համար դարձել է ավելի գունավոր: Թող նրանք միշտ միասին լինեն և անբաժան իրարից: Ինչպես ասում են` «Մի բարձի ծերանաք»: