Լուսանկարը` Արաքս Ահարոնյանի
Հայաստանի ամենատարբեր հատվածներում կարելի է գտնել Երկրորդ Աշխարհամարտում զոհվածների հիշատակին նվիրված հուշակոթողներ: Կոտայքի մարզի Կոտայք գյուղում ևս գյուղացիները Երկրորդ աշխարհամարտում զոհված համագյուղացիների հիշատակին նվիրված հուշակոթող են կանգնեցրել դեռևս 1975 թվականին: Հուշակոթողը գտնվում է գյուղի հյուսիսային եզրին, բլրի վրա և գերիշխող դիրք է գրավում ինչպես գյուղի, այնպես էլ շրջակայքի վրա: Գյուղի ամեն կողմից կարելի է նշմարել զգալի չափսեր ունեցող, դարչնակարմրավուն տուֆից կերտված հուշարձանը: Այն հայկական վաղ միջնադարյան շրջանի մահարձան-կոթողներին է հիշեցնում (Օձուն, Աղուդի), եռասյուն է, երկկամար: Վերին հատվածը ունի սրի բռնակի տեսք, որն այնուհետև շարունակվում է զույգ կամարների միջնամասով ներքև` թողնելով լայնաշեղբ սրի տպավորություն: Սյունաշարն ունի միասնական հիմք, որի վրա կնոջ և զինվորի հարթաքանդակներ են, կենտրոնական մասում` խաղաղության խորհրդանիշ համարվող ձիթենու ճյուղը ձեռքին կնոջ պատկեր է: Նրանից քիչ ներքև արևաքանդակ է, որպես հավերժության, կյանքի, լույսի ու ջերմության խորհուրդ:
Լուսանկարը` Արաքս Ահարոնյանի
Հուշակոթողը բարձրանում է պատվանդան-դամբարանի վրա, որի մուտքի երկու կողմերում առյուծների պատկերաքանդակներ են, որպես ուժի խորհրդանիշ: Կառույցի ընդհանուր բարձրությունը հասնում է մոտ 18 մետրի:
Ամեն տարի մայիսի 9-ին գյուղացիները ծաղիկները ձեռքներին բարձրանում են հուշարձան՝ զոհված համագյուղացիներին իրենց հարգանքի տուրքը մատուցելու: