Լուսանկարը՝ Անգելինա Կարապետյանի
Ամռանը հասնող բերքը ծառայում է ինչ-որ նպատակի: Մի մասը առևտրի միջոցով փոխանցվում է այն մարդկանց, ովքեր իրենց բակում ծառեր չունեն, իսկ մյուս մասը օգտագործվում է պահածոների, կոմպոտների և շատ սիրելի չրերի պատրաստման համար, որոնց տեսքը կարող է գրավել նույնիսկ «ամենաչքաղցրակեր» մարդուն:
Ամառը բուռն գործունեություն է ծավալում նաև մայրս: Նա չրեր է պատրաստում նույնիսկ նարնջի, ձմերուկի և կիտրոնի կեղևներից:
Լուսանկարը՝ Անգելինա Կարապետյանի
Նարնջի չիր պատրաստելու համար անհրաժեշտ են նարնջի կեղևներ, որոնք պետք է կտրատել տարբեր չափերով (ըստ ցանկության), լցնել կեռասի եփած հյութի մեջ, ինչը չրին տալիս է համ ու հոտ, և եռացնել: Երբ կեղևը փոխում է գույնը, դնում են չորանալու: Շատ հեշտ գործընթաց է:
Թզի չիր պատրաստելը նույնպես հետաքրքիր է: Ընտրել թզի առողջ պտուղներ, լվանալ, դնել ջրքամվելու: Հատ-հատ թաթախել ալկոհոլային խմիչքի մեջ (օղի, գինի, կոնյակ): Հանել, ծակծկել և շաքարապատել: Եռացնել և մեկ օր պահել արևի տակ, իսկ հետո՝ միջանցիկ քամու տակ:
Դդմիկի չիր պատրաստելու համար անհրաժեշտ է դդմիկը լվանալ, կլոր կտրատել, կորիզները մաքրել, լցնել օշարակի մեջ: Եռացնել այնքան, որ ստանա փայլուն տեսք: Շարել կաղապարի մեջ և օշարակը լցնել վրան:
Ինչպես ասում են, եկել են ձմռան նեղ օրերը, իսկ ամռան մասին հիշողությունները կթեթևացնեն սպասվող օրերի ծանրությունը: