Հուլիսի 23՝ Վարդավառ: Տարբեր տեղեր տարբեր կերպ է նշվում, բայց ավանդույթը մնում է ավանդույթ, որ պետք է իրար ջրել: Պատմեմ Տավուշի Վարդավառից: Եթե չնշեմ էլ, ապա հաստատ իմացած կլինեք, որ Տավուշը միշտ էլ յուրահատուկ մոտեցում է ցուցաբերում տոներին, այդ թվում նաև Վարդավառին: Մինչ քաղաքներում սպասում են, որ ծորակ բացեն, դույլ լցվի կամ ցայտաղբյուրից բաժակով ջուր վերցնեն կամ լավագույն դեպքում, սպասեն հրշեջ մեքենային՝ այդ ընթացքում տավուշցիները գետ են ցամաքեցնում: Տոնից մեկ օր առաջ գնում են սարեր, որոնք գյուղերից հեռու են մոտավորապես 40կմ, որտեղ բջջային կապը երազանք է թվում: Գնում տեղավորվում են և գնալու գիշերը մեծ մեքենաներով գնում անտառ, բերում քամուց ընկած մեծ ծառեր և պատրաստում խարույկ, որը ունի մեծ չափսեր, այնպիսին, որ մինչև առավոտ վառվում է: Դե պարզ է, խարույկը չեն վառի ու գնան վրաններ կամ մեքենաներ, նստում են մինչև ուշ գիշեր, պատմում պատմություններ, անեկդոտներ, տաղանդավորները երգում են և այդպես շարունակ, իսկ կամքից ուժեղները սպասում են արևածագին: Ամենուր խորովածի և խորոված սմբուկ-պղպեղի հոտ է:
Օրը ես միշտ սկսել եմ այս արտահայտությամբ. «Խնդրում եմ ինձ չջրեք»՝ ասելով տարբեր պատճառներ, կամ շոր չունեմ բերած կամ հիվանդ եմ կամ հեռախոս կա գրպանումս, բայց միշտ չի, որ ստացվում է փախչել: Կամ հանդիպում են մարդիկ, ովքեր պետք է իրենց ասածը անեն՝ ջրեն, կամ էլ խորամանկներ, որ փոքր բաժակով ջուրը շփում են դեմքիդ ու ասում, որ ոչ շորին ա խանգարում, ոչ էլ հեռախոսդ թրջվեց: Այդ հաճելի ապրումներին միացավ ևս մի հաճելի պահ, երբ իմացա, որ Վարդավառին ներկա են լինելու նաև՝ անծանոթների համար www.17.am -ի թիմից, իսկ ովքեր կապ ունեն 17-ի հետ հաստատ կճանաչեն. Աշոտը և Հովնանը, իրանց հետ նաև իմ սիրած լուսանկարիչ Արամ Կիրակոսյանը: Նրանք եկել էին փոքրիկ դոկումենտալ ֆիլմ նկարելու, թե ինչպես է անցնում Վարդավառը Տավուշի սարերում: Ինձ համար միշտ էլ Վարդավառը հաճելի տոն է եղել, բայց այս անգամ ավելի հաճելի էր, որովհետև, ինչպես ասացի, ներկա էին այդ լավ մարդիկ:
Ամեն ինչ հաճելի էր, բայց այդ ամենի մեջ կար նաև տխրեցնող և արտագաղթը հիշեցնող մի հատված, երբ անցնում ես ճանապարհով ու հիշում, որ պետք է ապակիները փակես մեքենաների, որպեսզի կարողանաս պաշտպանվել թփերի հետևում թաքնված երեխաներից: Բայց այս տարի թփերը դատարկ էին ու այն փոքրի լիճը, որը ճանապարհի մոտ է և ամեն անցնելուց այն շրջապատված էր վրաններով ու մեքենաներով, նույնպես դատարկ էր:
Այս տարին կարծես նման չէր Վարդավառի, այլ նման էր ազատ կիրակի օրվա, երբ պատահաբար ճանապարհին հանդիպում ես հանգստացող ընտանիքների: