Հարցազրույց «X Factor» նախագածի մասնակից Անգել Բարսեղյանի հետ:
-Ե՞րբ եք սկսել երգել և ե՞րբ` էլ ավելի խորացել երաժշտության բնագավառում։
-Երգել սկսել եմ 3 տարեկանից, 15 տարեկանից սկսել եմ զբաղվել երգեցողությամբ, իսկ խորանալ՝ 18-ից։ Այժմ իմ կյանքը չեմ պատկերացնում առանց երգի։ Ամեն ինչ սկսվեց մի ձայնարկիչից, որ ծնողներս էին ինձ նվիրել։ Ամեն անգամ միացնելիս, անկախ իմ կամքից, սկսում էի երգել։
-Ե՞րբ է եղել Ձեր առաջին մեծ բեմելը։
-Առաջին բեմելս եղել է 2009 թվականին «Միջազգային բեմ» փառատոնի ժամանակ։ Վերջինիս ժամանակ շատ ոգևորված էի, որովհետև ներկայանում էի իմ հեղինակային երգով՝ «Colour world» վերնագրով։
-Առաջին անգամ Դուք Ձեր ուժերը փորձեցիք «Մանկական Եվրատեսիլ»-ի նախընտրական փուլում՝ հանդիսատեսին ներկայանալով «Ողջույն» երգով։ Ո՞վ է եղել այն մարդը, ով սատարել է Ձեզ և ոգևորել, որպեսզի մասնակցեք այդ մրցույթին։
-Գաղափարը իմն էր ու իմ ընկերներինը։ Ինձ ամեն հարցում օգնում և սատար է կանգնում իմ հայրը, իսկ ինձ ոգևորելու հարցում օգնում են ընտանիքիս անդամները, հարազատներս, ընկերներս։
-Մասնակցել եք նաև «Իմ անունն է» նախագծին։ Նախագծի ֆորմատն այնպիսին էր, որ պետք է նմանակեիք որևէ երգչի։ Ինչպես այս անգամ՝ «X Factor» նախագծում, այնպես էլ «Իմ անունն է»-ում, Դուք ներկայացաք աշխարհահռչակ երգչուհի Ռիհաննայի երգերով ու կերպարով։ Ինչո՞ւ հենց Ռիհաննա, ի՞նչն է դուր գալիս Ձեզ նրա երգերի մեջ։
-Ռիհաննային ու նրա երաժշտական կարիերային հետևում եմ մոտ 11 տարի։ Չեմ ասի, որ նա իմ կուռքն է, ինձ դուր են գալիս նրա ձայնը, ոճը։ Նա իր տեսակի մեջ միակն է ու չկրկնվողը։
-Ձեր առաջին բեմելը «X Factor»-ում բավականին հետաքրքիր էր։ Ներկայացաք հետաքրքիր հագուստով՝ «վերցված Ռիհաննայի զգեստապահարանից»։ Այս անգամ, էլ ավելի ռիսկային բեմական կերպար էիք ստեղծել։ Չե՞ք վախենում արդյոք հասարակության քննադատող հայացքներից։
-Քննադատություններին վերաբերվում եմ շատ նորմալ. ինչքան մարդ, այնքան կարծիք։ Մեկին կարող եմ դուր գալ, իսկ մյուսին՝ ոչ։ Իսկ քննադատողներին ուզում եմ ասել, որ այդ ամենը շոու է, բեմական տեսք, և մարդու բարոյականության աստիճանը հագուստի կարճ կամ բաց լինելով չէ, որ պետք է սահմանվի։
-Ձեր ելույթի վերաբերյալ ժյուրիի կողմից հնչեցին ինչպես դրական, այնպես էլ բացասական կարծիքներ։ Իսկ ըստ Ձեզ, ինչպիսի՞ն էր Ձեր ելույթը։
-Ես միշտ ձգտում եմ կատարելության։ Չեմ ժխտում, ձայնս տեղ-տեղ լավը չէր։ Բայց շոուն ու բեմական տեսքն այնպիսին էին, ինչպես ես էի ուզում, ու երկար աշխատանքս տվեց իր արդյունքը։
-Վերջերս ներկայացաք խմբային տեսահոլովակով։ Կարո՞ղ ենք սպասել անհատական տեսահոլովակի։
-Բնականաբար։ Առաջիկայում իմ հեղինակային երգի պրեմիերան է լինելու։
-Իսկ կմասնակցե՞ք «X Factor»-ի հաջորդ եթերաշրջանին։ Մի՞թե հաջորդ փուլ չանցնելը կոտրեց Ձեզ։
-Չեմ կարող ասել՝ կմասնակցեմ հաջորդ «X Factor»-ին, թե ոչ, բայց ես երբեք չեմ կոտրվում և չեմ հանձնվում։ Առաջիկայում նոր պլաններ ունեմ, որոնք բոլորը պիտի իրականացնեմ։
-Ի՞նչ պլանների մասին է խոսքը։
-Նոր երգ, նոր տեսահոլովակ, ընկերներիս հետ համերգային տուրեր։ Դե, իսկ գովազդային ընկերություններից ստացած առաջարկները շատ-շատ են։ Չեմ ուզում բոլոր պլանները թվարկել, թող մնան անակնկալ։
-Հետաքրքիր է, թե ինչպիսի՞ն է Ձեր երգացանկը։ Ո՞ւմ երգերն եք ավելի շատ լսում։ Կարո՞ղ եք նշել մի այնպիսի երգ, որը հոգեհարազատ է Ձեզ։
-Երգացանկս ժամանակ առ ժամանակ փոխվում է։ Բայց բոլոր ժամանակների ամենահոգեհարազատ երգը Ռիհաննայի և Էմինեմի «Love the way you lie» երգն է։
-Կարճ ժամանակում ձեռք բերեցիք երկրպագուների մեծ բանակ՝ ինչպես Ձեր տաղանդի, այնպես էլ գեղեցկության շնորհիվ։ Ո՞րն է Ձեր ուղերձը երկրպագուներին։
-Շատ հաճելի է, երբ քեզ հարգում, գնահատում, սիրում ու հետևում են՝ դառնալով քո երկրպագուն։ Մարդիկ մտածում են, որ ես շատ մեծամիտ ու գոռոզ եմ, բայց իրականում այդպես չէ, ուղղակի չեմ հասցնում պատասխանել բոլորի նամակներին։ Նրանց միայն կասեմ, որ իրենց շատ եմ սիրում:
-Նշեք այն խորհուրդը, որով առաջնորդվում եք։
-Միշտ ասել եմ ու կասեմ, որ պետք է լինել անհատականություն, տարբերվել մյուսներից։ Լինել գիժ հոգով, այլ ոչ թե ձևական։ Այն, ինչ անկեղծ է, հոգու խորքից, միշտ գնահատվում է։ Պետք է միշտ լինել համարձակ և միաժամանակ չմոռանալ Աստծու մասին։
